Maraton d'Engiadina: Ferma delegaziun Svizra a la partenza

Al 44avel maraton d'Engiadina è ina ferma delegaziun Svizra a la partenza. Cun excepziun da Dario Cologna che sa concentrescha sin il final da la cuppa mundiala en Svezia, èn ils pli ferms passlunghists Svizzers da la partida al maraton da Malögia a S-chanf.

Fischer, Perl e Livers

 

Remo Fischer, il victur da l'onn passà, è sa preparà a Magglingen sin il maraton. Il matador local Curdin Perl è currì ier il classicher da 50 kilometers al Holmenkollen. Quant fit ch’el è damaun per il maraton da l’Engiadina vegn a sa mussar. Gia dapi in per dis en Engiadina è perencunter Toni Livers da Trun.

 

 

Boner è pronta

 

La partenaria da Toni Livers, Seraina Boner, ina da las cunfavuritas per la victoria tar las dunnas ha fatg ils davos 2 onns in interessant svilup. Perquai ch’ils success mancavan en la cuppa mundiala, ha ella cumenzà a currer las pli impurtantas cursas popularas dal mund - e quai cun grond success. Plazs da podest en seria e schizunt victorias a cursas da renum. Entaifer curt temps è Seraina Boner sa sviluppada ad in dals stars da la scena. A sia cursa da chasa è Seraina Boner gia stada 2 giadas sin il podest.

 

 

Gianluca enstagl da Dario

 

Enstagl da Dario Cologna è ses frar Gianluca Cologna a la partenza. Quel sa legra sin la partenza da damaun. Punct culminant da sia stagiun è stà fin ussa il 5avel plaz en il sprint dal campiunadi mundial dals U23 en Tirchia. (gc/rtr)

 

 

 

 

 

RTR rapporta dal maraton da l’Engiadina. A partir da las 6 la damaun enfin da mezdi live en il radio. Il Telesguard emetta sin SFinfo da las 18.15 impressiuns dal 44avel maraton da l’Engiadina. La partenza da la cursa è da las 8.30.