Samedan: Lieu per nova chasa da tgira anc betg clar

En sia ultima sesida ha il parlament d’Engiadin’Ota prendì conuschientscha d’in nov project da studi per sanar ed engrondir la chasa da tgira existenta Promulins a Samedan.

Quai suenter ch’in postulat inoltrà in avrigl 2011 pretenda l’examinaziun d’ina alternativa per il project victur al lieu sur l’ospital.

Postulat pretenda alternativa valida

Surtut puncts relevants sco funcziuns, custs da gestiun, e pussaivladads d’etappar il fabricat duain vegnir examinads dal parlament, avant ch’in credit vegnia dat liber per projectar la chasa al lieu “ospital”.

Tenor il studi preschentà fiss da far quint cun custs d’investiziun tranter 30 e 40 milliuns francs per il project Promulins. Tar la varianta sur l’ospital discurriv’ins fin uss da custs da var 50 milliuns francs.

Il parlament d’Engiadin’Ota vegn a decider en sia proxima sesida ils 26 avrigl 2012 schi’ns duai revegnir sin la decisiun pertutgond il lieu da la nova chasa da tgira u betg. (rtr/ac)