Svizra

Cybermobing - ristga da suicidi crescha

Cybermobing, in nov problem social. L’internet cun paginas socialas sco Facebook porscha ina gronda ristga ch’uffants e giuvenils daventan victimas da mobing.

Ina fotografia penibla u in spruh, ina beffa e quai repetidamain e cun sistem. Ils pertutgads pon vegnir uschia en grondas miserias. La consequenza possia esser ch’uffants e giuvenils sa tirian da la vita sociala, survegnian depressiuns ed uschia possia era la ristga per suicidi crescher. Quai di Silvio Caviezel da la Pro Juventute Grischun. E per il scolast Gabriel Derungs saja il cybermobing ina furma anc bler pli subtila e nauscha ch’il mobing sin plazza da scola.

 

 

Discurrer dal problem è buna prevenziun

 

Era il psicolog d'uffants Philipp Ramming è da l'avis che mobing en l’internet saja pli simpel, las barrieras èn pli bassas. Oramai che la distanza entras l'internet reduceschia il sentiment da responsabladad dals acturs. Dentant: per Ramming na dettia quai betg dapli mobing che pli baud, dentant discurran ins dapli dal problem. E quai fa plaschair a Ramming. Per el saja discurrer dal problem ina fitg buna prevenziun. (fc/rm/rtr)