Il cussegl federal e la banca naziunala prendian savens decisiuns conservativas e perquai giajan bleras plazzas da lavur en l'exteriur. Levrat ha plinavant ditg che la raschun ch'il franc svizzer saja uschè ferm saja er ina consequenza d'ina politica conservativa. Pliras dieschmilli plazzas da lavur en Svizra sajan perquai periclitadas e cun mintg'emna vegnia la situaziun mendra, uschia Levrat

Auzar curs sin 1.40 francs

Il privel d’ina segunda recessiun smanatschia era 3 onns suenter il cumenzament da la crisa finanziala ed economica. La suprastanza da la PS ha perquai pretendì mesiras che rinforzan la plazza da lavur en Svizra e che sbassan la valita dal franc svizzer envers l’euro. Il curs dal franc svizzer envers l’euro duaja vegnir auzà sin almain 1.40 francs.

Mesiras per proteger lavurants

 
Ils delegads da la PS han la fin finala approvà unanimamain ina resoluziun che pretenda cuntramesiras per proteger ils lavurants e l’entira economia publica. Il ristg dal curs da stgomi na dastgia betg vegnir stuschà sin ils lavurants.

 

Trais giadas na

Ils delegads da la PS han plinavant era gì da prender la parola per ils 3 projects da votaziun dals 17 da zercladur, ed els han 3 giadas ditg na. Tant l’iniziativa dal pievel davart il respargn immobigliar, sco era l’iniziativa da l’AUNS che vul rinforzar ils dretgs dal pievel en la politica da l'exteriur, han els refusà . Er al project da Managed Care recumondan ils delegads da dir na.

Dapli custs als pazients

Levrat ha menziunà en connex cun il project da Managed Care che la Svizra dovria bain ina rait da provediment integrada en il sectur da la sanadad. Quella na duai dentant betg vegnir manada da las cassas da malsauns, mabain dals chantuns. La proposta da Managed Care chaschunia dapli custs als pazients. (gc/sda)