Turitg: Freitag en il museum

  • Publicaziun: 05-04-2012, 07.00

Las tastgas da la firma Freitag èn enconuschentas dapertut en la Svizra. L'exposiziun "Freitag - Out of the Bag" emprova d'eruir co design ed in bun nas da far fatschentas giogan cun success ensemen. En siat boxas che fan allusiun a cars annex da camiuns mussa l'exposiziun l'istorgia da Freitag, dat in'invista en la producziun da las tastgas, mussa co products vegnan sviluppai e co Freitag venda las tastgas. Dasperas mussan projecziuns da video differents pass da lavur tar Freitag. Davent dal tagliar dapart las blatgas enfin tar il pachetar las tastgas finidas.

Ina relaziun speziala han ils dus frars e fundaturs da Freitag, Markus e Daniel Freitag tar il lieu da l'exposiziun. Omadus han studegià a la scola d'artisanadi da Turitg a la quala il museum tutga. Markus Freitag è perquai loschs da survegnir ina tala exposiziun da la scola nua ch'els han studegià.

 

 

In'istorgia da success
Entschet ha tut il 1993 a Turitg cura ch'ils dus frars han tschertgà ina tastga robusta che protegia lur skizzas e dissegns da la plievgia. Inspirads dals camiuns che charravan mintga di sper lur WG ora han els lura sviluppà ina tastga or da las blatgas veglias da camiuns. Dapi lura è l'expansiun da Freitag ida vinavant a moda spectaculara. Oz lavuran dapli che 130 persunas per Freitag. En la fabrica nova ad Oerlikon lavan e taglian els da quai da 390 tonnas blatgas mintg'onn. En las nov atgnas stizuns en la Svizra, la Germania, a Vienna, New York e Tokyo, en l'internet e sur passa 400 stizuns partenarias vendan els dapli che 300'000 products mintg'onn, tendenza ensi viers. (aw/aca/rtr)