Homs: Armada bumbardà cun granatas la citad

L'armada siriana sco era l'opposiziun han danovamain blessà l'armistizi en la Siria. Sco quai che l'opposiziun ha infurmà, han truppas da l'armada bumbardà cun granatas il center da la citad da Homs.

En la citad d'Aleppo hajan rebels da l'opposiziun attatgà in post da la polizia, uschia il post d'observaziun per ils dretgs umans a Londra. Silsuenter haja quai dà cumbats cun la polizia. Regenza ed opposiziun reproschan in a l'autra da rumper l'armistizi che vala dapi gievgia. (fc/sda)