Ils 22 da fanadur 2011 aveva l'um da 33 onns laschà explodir ina bumba ad Oslo e mazzà 8 persunas. Silsuenter ha el sajettà enturn sin l'insla dad Utoya e mazzà 69 persunas, surtut giuvenils.

Psichicamain malsaun u betg?

La dretgira ad Oslo sto decider sche Anders Behring Breivik vala psichicamain sco abels da giuditgar u betg. In'emprima expertisa aveva taxà el sco psichicamain malsaun (schizofrenia paranoida). En quest cas stuess el ir en ina clinica psichiatrica.

Ina secunda expertisa pretenda che Breivik saja dal tuttafatg abels da distinguer tranter bun e nausch e cunquai betg psichicamain malsaun. Sche la dretgira suonda a quest parairi lura stuess l'attentader ir per 21 onns en praschun, il chasti maximal en Norvegia per acts da terror.

"Attentat sgarschaivel - dentant necessari"

Anders Behring Breivik pretenda dad esser psichicamain saun ed ha confessà d'avair mazzà 77 persunas. Tuttina vul el pretender avant dretgira d'esser innocent e d'avair agì en ina situaziun d'urgenza. Breivik numna sias attatgas terroristicas "sgarschaivlas - dentant necessarias". El haja vulì far attent sin "l'invasiun muslima en l'Europa", ina tesa rassistica ch'el aveva era publitgà en in manifest da 1’500 pagina en l'internet.

Bleras perditgas ed accusaders accessorics

Il process ad Oslo sveglia interess sin l'entir mund e grondas emoziuns: 150 perditgas dattan pled e fatg e 770 persunas che han survivì las attatgas u parents da las unfrendas tgisan era encunter Breivik. Il process dura circa 10 emnas. Quai vul dir che la sentenzia vegn enconuschenta circa in onn suenter ils attentats. (nc/fc/rtr)