PLD: Philipp Müller nov president

Ils delegads da la PLD han elegì unanimamain il cusseglier naziunal da l'Argovia a chaschun da la radunanza da delegads a Berna.
Müller, che ha 59 onns e ch'è stà il sulet candidat, succeda a Fulvio Pelli che ha presidià la PLD durant 7 onns.
Suenter sia elecziun ha Müller ditg, che suenter las sperditas tar las davosas elecziuns giaja ussa puspè ensi cun la PLD.
Tenor Müller è la PLD "too big to fail".

Cumià cun grond applaus per Pelli


Ils delegads da la PLD han dentant prendì cumià dal president scadent, Fulvio Pelli, cun grond applaus. Il Tessinais ha manà la partida durant 7 onns. Il cusseglier federal, Didier Burkhalter, ha onurà Pelli sco construider da punts passiunà e sco vaira persuna liberala.

 

 

Novas parolas per la PLD


Ultra da quai han ils delegads da la PLD era prendì parolas oz:


La PLD approvescha il model da managed-care. Ils delegads èn uschia suandads lur cusseglier federal Didider Burkhalter. Lez ha anc ina giada fatg reclama per il model da managed-care oz a Berna.


Na han ils delegads da la PLD dentant ditg a l'iniziativa da l'acziun per ina Svizra independenta e neutrala AUNS. L'iniziativa pretenda, che contracts internaziunals vegnan avant il pievel. Ils dus projects van en votaziun ils 17 da zercladur. (sd/sda)