La sonda

Cletg cun l'aura

Cun l’aura han ils organisaturs gì cletg. Suenter ch’i ha pluvì ier l’entir di, èsi oz finalmain bell’aura. Quai ha era carmalà blera glieud a Grüsch.

Lavur supplementara a caussa da l'aura

Pervi da la plievgia han ins stuì far blera lavur supplementara ils davos dis. Uschè han per exempel scorsas stuì vegnidas messas sin il prà, per ch’ils visitaders na sfundran betg.

Blers custs cuverts da sponsurs

L’Agrischa 2012 è vegnida budgetada cun 480’000 francs. 2/3 da quels vegnan cuverts cun entradas da sponsurs, ha ditg il president dil comité d’organisaziun, Jöri Lutz. Il rest vegni cuverts cun las entradas da la restauraziun e cun l’entrada da 5 francs.

Gronda multifariadad en il Partenz

Varga 80 expositurs preschentan lur products ed animals. La finamira saja, da pudair mussar la gronda multifariadad da l’agricultura en il Purtenz a mintgin. Ils organisaturs quintan cun var 10’000 visitaders. (rtr/gh/sd/fa)
 

La dumengia

Ils organisaturs da l’Agrischa èn fitg cuntents cun igl emprim di la l’exposiziun. Sco quai ch’il president dal comité d’organisaziun, Jöri Luzi, ha ditg al Radio Rumantsch hajan els gì ier tranter 5000 e 6000 visitaders ed i haja dà nagins incaps.

Miss Agrischa 2012 va a Pepita da Tavau
Il punct culminant saja l’exposiziun da muvel stada e la premiaziun. Il titel da Miss Agrischa 2012 ha la vatga Pepita da Florian Schamaun da Tavau survegnì. Mo era las exposituras ed ils expositurs èn fitg cuntents cun il di dad ier. La blera glieud saja segir d’engraziar a la bell’aura. Jöri Luzi quinta era oz cun 4000 fin 5000 visitadras e visitaders e quinta uschia da cuntanscher la finamira da 10’000 visitaders. Ina egliada sin il plaz da l’exposiziun mussa che quai è senz’auter pussaivel.

La mala prognosa da l’aura para numnadamain betg d’avair fatg tema a la glieud. Oz avant mezdi ès i lura era stà sitg e magari haja dà schizunt in per radis da sulegl. (rtr/gh/sd)

Inscunter tranter purs è ì a perder

L'Agrischa promova contacts. En sasez è l'Agrischa ina fanestra per ils purs, per sa preschentar a la populaziun. Però, l'Agrischa è er in lieu d'entupar tranter ils purs. Tenor Oscar Duschletta, cussegliader da purs al Plantahof, è quai in fatg impurtant. Damai ch'ils purs s'entaupan ozendi  pli e pli pauc. Ultra da quai porschia l'Agrischa er il barat tranter purs da latg e purs che tegnan vatgas mamma.

(rtr/rm/sd)