Per l’istoricher Martin Matter èsi cler suenter ch’el ha discurrì cun plirs anteriurs commembers da la P-26, ch'han stuì taschair fin il 2009. La percepziun d'antruras da quella organisaziun secreta na correspunda betg a la realitad. L'impressiun per exempel che mintg'in dals bun 400 commembers haja gì mitraglias e buis spezialas na correspundi betg. Mo ina fitg pitschna part saja vegnida scolada d’utilisar quellas armas spezialas.

Nagin’armada

Quella “armada” era tenor Matter structurada en fitg pitschnas parts, numnadas “regiuns da resistenza” cun 6 fin 12 persunas. Tut secret. Ils commembers n’enconuschevan almain dus trais auters commembers da la P-26. “En cas d'urgenza n’è quai mai stà l'intent da colliar tut quellas regiuns da resistenza tar ina unitad”, di Matter “Uschia ch’ins na sappia betg discurrer d’ina armada.”

Resistenza cunter occupants
 

Coordinà las differentas regiuns da resistenza avess en cas d'urgenza il stab ed il cussegl federal en l'exil sur func. Vul dir: en il cas che la Svizra fiss vegnida occupada da l'anteriura Uniun Sovietica, l'armada fiss vegnida schliada ed il cussegl federal svanì en l’exil.

Quai maletg da la P-26 e da ses commembers che Matter ha survegnì entras ils discurs. Quai maletg ha el vulì mussar a la publicitad. E per quai cumpara ussa ses cudesch “P-26. Die Geheimarmee die keine war.” (gc/rtr)