Il 1946 han persunas curaschusas cumenzà a salvar disgraziads en la muntogna er ord l’aria. Emprim cun aviuns, pli tard lura cun helicopters. In grond svilup, pertge avant stuevan quels che disgraziavan en muntogna per part spetgar plirs dis fin ch’ina gruppa da salvament arrivava a lieu.

Agid bainvesì

6 onns pli tard, ils 27 d’avrigl 1952, ha il medi Rudolf Bucher alura fundà l’aviatica da salvament en Svizra ch’è oz enconuschenta sco Rega. A partir da lura ha il salvament or da l’aria adina fatg dapli progress. La Rega è daventada in agid bainvesì. Betg mo en Svizra, mabain er en l’exteriur.

Problems finanzials cumenzan

Il 1960 realisescha la Rega lura ses emprim sgol da repatriaziun. In pazient vegn sgulà enavos da la Frantscha en Svizra. En il decurs dals onns senta la Rega dentant adina pli fitg il squitsch economic. Ils daners vegnan pli e pli scarts tar la Rega, uschia ch’ella tschertga il 1966 l’agid da la populaziun. Mintgin po pajar ina contribuziun annuala da 20 francs, survegn persuenter en cas d’ina disgrazia gratuitamain sustegn da la Rega. Ord quella mesira resulta il sistem da fauturs che vala anc oz.

60 onns experientscha

En tut datti en Svizra 13 staziuns da basa, 2 da quellas èn en Grischun. 60 onns d’experientscha han procurà che la Rega vala ozendi sco instituziun exemplarica per acziuns da salvament or da l’aria. Cun il 60avel anniversari datti quest onn er blers dis da las portas avertas tar la Rega. (gc/rtr)