Managed Care: Lartg comité fa reclama
-
- Zoom
- Ina largia allianza fa reclama per in gea a la revisiun da la lescha davart l'assicuranza da malsauns. (Keystone)
La revisiun da la lescha federala davart l'assicuranza da malsauns è in dals trais temas da las votaziuns federalas dals 17 da zercladur da quest onn. In'allianza fitg largia, cun represchentants dad 8 differentas partidas politicas, ha preschentà a Berna ils arguments positivs per introducir l'uschenumnà Managed Care.
Managed Care è in sistem, che vuless gulivar or meglier ils ristgs da las cassas da malsauns. Ils differents acturs en la branscha da sanadad as duessan ultra da quai coordinar meglier che fin uss.
Managed Care: Tgira pli segira, meglra e bunmartgada
Cun Managed Care vegnia la tgira da pazients “pli segira, meglra e pli bunmartgada”. Quai è l’argument principal da politichers da sanadad, che fan reclama per in gea a la revisiun da la lescha davart l’assicuranza da malsauns.
Franar explosiun da custs tar sanadad
Grazia a raits da provediment integradas, nua che medis da chasa, medis spezials e fisioterapeuts sa collieschan per coordinar il provediment medicinal, vegnian charas duplicitads e plirs tractaments evitads.
I dettia era damain malchapientschas e cumplicaziuns. Plinavant duai l’explosiun da custs en fatgs da sanadad vegnir franads.
Il comité sa cumpona d’exponents da las partidas burgaisas PPS, PLD, PCD, PBD, PVL e PEV, dentant era da singuls exponents da la PS e dals Verds.
(fa/sda)
