A Bogn Ragaz ed en il Signuradi han ins mesirà vents da 135 kilometers l'ura ed a Cuira 110 kilometers l'ura.

Dumengia saira fetschia il favugn dentant pausa, ha ditg Jürg Zogg. Pir glindesdi sufla quai puspè pli ferm, dentant betg pli uschè ferm sco la sonda e la dumengia.

Cun ulteriurs donns entras plantas che sa derschan na stoppia il Grischun pli probabel betg quintar, hai num da SF Meteo.

Divers disturbis da traffic en il Grischun
Il ferm favugn da la notg passada e dad oz en damaun ha chaschunà divers donns e disturbis dal traffic en il Grischun. Il vent ha derschì plantas sin vias e binaris da viafier en il Grischun.

En Surselva era il traject tranter Mustér e Sumvitg interrut fin il suentermezdi da las 15. Era la lingia da l’Alvra è stada interrutta fin las 16. Anc adina serrà è il traject da la Viafier Matterhorn Gottard tranter Mustér e Tschamutt.

La via chantunala tranter Tusaun e Ziraun è stada interrutta pervi da plantas ch'èn sa derschidas.

Quai è stà in problem, perquai ch'ina part dal traffic da l'autostrada A 13 ha stuì vegnir manà sur la via chantunala, pervi d'in deffect dals indrizs electrics dals tunnels da l'autostrada.

 

Favugn ha furià fitg en Lumnezia
Ferm ha il favugn oravant tut er buffà en Lumnezia. La damaun era la via tranter Vrin e Nussaus serrada pervi da plantas derschadas ed ina bova.

A Vattiz ha il vent sufflà in tetg da sturs d'ina stalla giu sin dus autos. Quai ha fatg donns als autos, persunas n’eran dentant betg pertutgadas. A Degen è ina part dal tetg da la baselgia vegnì suflà davent. Er a Vrin hai dà donns vi da tetgs.

Probabel donns pli gronds en guauds grischuns
Il favugn ha probabel er chaschunà donns pli gronds en ils guauds grischuns. Da preschent n’èsi anc betg cler quant gronds che quels èn. La situaziun vegnia sclerida glindesdi durant il di, hai gì num da vart uffiziala. En Surselva sgola glindesdi suentermezdi in helicopter per dar in'egliada sin ils donns.

Era a Cuira ha il stemprà chaschunà donns. Tenor la polizia da la citad, ha il vent fatg cupitgar pliras plantas e puntanadas. Blessads n'haja quai dà nagins, scriva la polizia.

(fa/rtr)