Il favugn ha furià fitg en Lumnezia
Ferm ha il favugn oravant tut er buffà en Lumnezia. Dumengia damaun era la via tranter Vrin e Nussaus serrada pervi d'ina bova e pervi da plantas derschidas.

A Vattiz ha il vent sufflà in tetg da sturs d'ina stalla giu sin dus autos.

A Degen è ina part dal tetg da la baselgia vegnì sufflà davent.

Er a Vrin hai dà donns vi da tetgs. Donns vi da tetgs da stallas hai era dà en il conturn da Mustér e da Sedrun.

Favugn ha era furià en ulteriurs chantuns da la Svizra
Il favugn ha era furià en la part sura dal chantun Berna. Era là hai dà donns vi da tetgs. A la polizia èn vegnids annunziads enturn 70 problems che stevan en connex cun il stemprà da favugn.

En blers lieus è l'electricitad crudada or. En acziun èn ils pumpiers stads en spezial en las valladas da la Simmen, Kander e dal Haslital.

Era la viafier da la Jungfrau è stada pertutgada dal favugn. Nagins trens èn per exempel cursads dumengia damaun tranter Lauterbrunnen e Wengen ed a Meiringen han ins mesirà suffels cun spertadads da bunamain 150 kilometers l'ura.

Persunas n’èn dentant betg stadas pertutgadas dals stemprads da favugn en Svizra.

 

Probabel donns pli gronds en guauds grischuns
Il favugn ha probabel er chaschunà donns pli gronds en ils guauds grischuns. Da preschent n’èsi anc betg cler quant gronds che quels èn. La situaziun vegnia sclerida glindesdi durant il di, hai gì num da vart uffiziala.

En Surselva sgola glindesdi suentermezdi in helicopter per dar in'egliada sin ils donns.

(fa/rtr)