Pro Juventute: Nov’idea per entradas durablas
-
- Zoom
- Sin la pagina d'internet da la Pro Juventute dal Grischun na datti nagins indizis dal nov product cun il qual ins vul generar entradas durablas. (projuventute-gr.ch)
La Pro Juventute dal Grischun n’haja mai gì da quels problem sco la Pro Juventute Svizra. Dentant era la fundaziun dal Grischun stoppia mirar d’administrar bain las finanzas, uschia la Pro Juventute dal Grischun.
Damain fatschenta cun marcas
Per insumma savair far insatge stoppia la Pro Juventute survegnir daners. Quels vegnian per l’ina via donaziuns per l’autra via la vendita da marcas postalas u autras causas. Ina marca dad in franc ch’ins paja 1,20 francs van 20 raps a la Pro Juventute. Quella fiera haja dentant laschà suenter ils davos onns, conceda la Pro Juventute Grischun. Ils tegnairchasas privats tramettian pli blers e-mails che brevs. Quai sentian ins era el Grischun.
Product innovativ
La tschertga per novas ideas saja greva. Per il mument spetga l’uniun Grischuna sin in nov product innovativ da la fundaziun Pro Juventute Svizra. Quest product, ch’ins na vul betg anc tradir, pudess purtar las novas entradas durablas per la Pro Juventute. I sa tractia pli probabel d’in product ch’haja da far insatge cun telecommunicaziun.
Pitschen gudogn
Sut il stritg vai dentant bain a la Pro Juventute dal Grischun. L’uniun chantunala ha per l’onn passà schizunt pudì far in pign gudogn dad 11’000 francs. (gc/rtr)
