Festa da 1. matg a Cuira
Demonstrà è era vegnì a Cuira. Bun 150 persunas èn sa participadas al til tras la chapitala grischuna. Il til è ì davent da la staziun sin il plaz da l’Arcas en la citad veglia. Là hai dà gril e musica ed igl è plitost vegnì fatg festa che vegnì demonstrà.

Avant che la festa ha cumenzà, han differentas persunas fatg pled. Tranter auter era la cussegliera naziunala Silva Semadeni. 
 

S'engaschar per maioritads
A Turitg èn passa 12’000 persunas sa participadas a las manifestaziuns dal prim da matg. Tenor la polizia saja la manifestaziun stada paschaivla.

Tar ses pled sin il Bürkliplatz ha il president da l'uniun sindicala svizra, Paul Rechsteiner, appellà las partidas da la sanestra da s'engaschar per maioritads. Be uschia possian ins franar svilups fallids.

Tenor Rechsteiner dovria quai ina politica da paja raschunaivla e contracts da lavur collectivs per che tuts possian profitar dal schlantsch da l'economia e betg be ils acziunaris.

Critica vers Schneider-Ammann
Il president da la Partida socialdemocratica svizra, Christian Levrat, avertescha d'ina deindustrialisaziun zuppada sco quai ch'i ha dà en l'Engalterra sut la regenza da Margaret Thatcher.

En ses messadi da video per il prim da matg crititgescha Levrat er il minister d'economia Johann Schneider-Ammann e sia antecessura Doris Leuthard. Pervi da pajas stagnantas e premias da cassas da malsauns pli autas, hajan bleras famiglias pli nauschas situaziuns finanzialas ch'avant 10 onns, uschia Levrat.

Allianza tranter generaziuns
Tar ses pled d'emprim da matg ha il cusseglier federal Alain Berset accentuà l'impurtanza da las assicuranzas socialas.

Assicuranzas socialas sajan in'allianza tranter las generaziuns, tranter malasauns e sauns, tranter lavurants e patruns e sajan impurtantas per la pasch da la lavur e per la solidaritad entaifer la societad.

Plinavant pretenda Berset dapli egualitad tranter um e dunna.
 

Manifestaziuns er en l’exteriur
Er en l’exteriur hai dà manifestaziuns d’emprim da matg. Tenor il radio statal da la Grezia, han protestà pliras milli persunas en diversas citads cunter las mesiras da spargn da la regenza.

En Germania èn var 400’000 persunas idas sin via. Ils sindicats avevan clamà a passa 400 manifestaziuns en tut il pajais. Finamira dals sindicats è ch'i vegnia introducì ina paja minimala dad 8euros e 50 per ura.

(gc/fa/sda)