Tenor Rosita Valaulta-Vinzens da Schluein ch’è cussegliadra da moviment, nutriment e wellness èn ils blers l’entschatta memia fitg motivads e quai possia chaschunar dapli donn che quai ch’i fetschia dal bain. Mal la musculatura, ils lioms u las giugadira èn tenor Valaulta-Vinzens las consequenzas. “Insumma, ins na sa sentia betg bain en la pial”, di Valaulta-Vinzens. “In trenament stentus ha gist il cunter-effect.”

Cumenzar plaun

Per cumenzar bain il trenament suenter ina pausa pli lunga n’importia quai betg tge sport ch’ins fetschia, ins stoppia simplamain cumenzar plaun e na betg sfurzar. “Per exempel sch’ins va a currer, alura na curri betg l’entira lunghezza en ina giada”, di la cussegliadra da moviment, nutriment e wellness Rosita Valaulta-Vinzens. “Emprim 5 minutas currer e lura 2 minutas a pè”, cusseglia ella. Quai uschè ditg ch’ins possia currer l’entira distanza senza vegnir ord flad. (gc/rtr)