Grischun: Derungs è nov president da la SGIC
-
- Zoom
- Markus Derungs, il nov president da la Societad grischuna dals impressaris constructurs ch’è oriund da Tavau. (RTR, C. Lombriser)
Markus Derungs è il nov president da Societad grischuna dals impressaris constructurs (SGIC). La radunanza generala ha elegì Derungs sco successur da Franco Lurati che ha demissiunà suenter 9 onns a la testa dals impressaris.
Derungs è oriunds da Tavau ed ha ina pitschna interpresa da construcziun. Da nov en la suprastanza è era vegnì elegì Claudio Giovanoli da Tumegl.
Bun onn 2011
Plinavant ha la radunanza approvà il rapport annual dal 2011 che po guardar enavos sin in bun onn. L’onn passà ha la branscha da construcziun grischuna registrà per l’emprima giada in volumen da bajegiar da passa 1 milliarda francs. Radund la mesadad da las incumbensas derivan dal maun public.
Iniziativa da segundas abitaziuns è stà in tema
Era l’iniziativa da segundas abitaziuns è stà in tema a la radunanza a Lai. La suprastanza ha suttastritgà ina giada dapli la pretensiun ch’il dretg actual vali enfin la fin da l’onn, che la nova ordinaziun na vali betg per abitaziuns veglias e che la definiziun d’ina segunda abitaziun saja da tegnair stretg. (fc/rtr)
