Quest onn il zercladur è la festa da chant chantunala a Trun e l’onn proxim organiseschan il chor viril ed il chor maschedà da Laax la festa da chant ceciliana per ils chors ecclesiastics da la Foppa e la Lumnezia.

Damain chors

Las festas da chant sa cumuleschan en Surselva. La consequenza è la sminuziun d’annunzias dils chors e problems da chattar chors ch’èn pronts d’organisar talas festas da chant.

Pertscharts

Sco Ewald Vinzens, il president da l’uniun da chant districtuala da la Surselva ha confirmà al Radio Rumantsch, è la suprastanza dal district da chant Surselva conscient da las numerusas festas e perquai ha la proxima festa da chant dal district lieu pir en 5 u 6 onns suenter la davosa a Glion. Per simplifitgar l’organisaziun da la festa da chant districtuala less ins empruvar da sminuir questa sin in sulet di.

In sulet suentermezdi

Quai è era l’intent da l’uniun da chant ceciliana da la Surselva. La presidenta Marlis Caduff ha decleraà al Radio Rumantsch, che la festa vegni organisada l’onn proxim durant in sulet suentermezdi, e quai da nov ina sonda. Sche quai modus sa cumprovia, fissi pussaivel era a chors pli pitschens d’organisar ina tala festa da chant.

Fussiun pussaivla

Era ina fusiun cun l’uniun da chant districtuala da la Surselva fiss ina pussaivladad, tenor Marlis Caduff. Dentant stuess ins dar dapli paisa al chant ecclesiastic entaifer l’uniun da chant districtuala.In emprim pass en questa direcziun ha l’uniun da chant districtuala gia fatg quest onn cun porscher ina bursa da notas per chanzuns da baselgia il schaner vargà a Trun. Ewald Vinzens e la suprastanza da l’uniun da chant districtuala da la Surselva èn medemamain averts per discussiuns da fusiun. (ab/fc/rtr)