Confirmà claramain han ils delegads era las propostas da la suprastanza centrala per ils 7 commembers dal vicepresidi. Cunquai resta l'anteriur Cusseglier federal Christoph Blocher vicepresident da la PPS.

Crititgà cussegl federal

A chaschun da la radunanza da delegads ha il president Toni Brunner crititgà il Cussegl federal. Lez na tschantschi betg cler e dovri bels pleds per zuppar il cuntegn. Il pli impurtant saja per il Cussegl federal sco i pari da star là a moda buna en las medias. Brunner ha appellà als delegads da betg sa laschar tschorventar dals bels maletgs ord la chasa federala.

Parolas

Plinavant han ils delegads da la PPS decidì las parolas per la votaziun dals 17 da zercladur. Els dian na al project da Managed-Care. Quai suenter che la maioritad da la fracziun da la PPS en chasa federala aveva anc sustegnì la revisiun da la lescha davart l'assicuranza da malsauns.

Gea a l'iniziativa da l'AUNS

In cler Gea proponan ils delegads tar l'iniziativa da l'AUNS cun il titel "accords internaziunals avant il pievel" e per l'iniziativa per la promoziun dal respargn immobigliar.

Parolas dals verds-liberals

Era la partida verd-liberala ha decidì las parolas per la votaziun da zercladur. A Cuira han ils delegads ditg gea al project da Managed-Care. In clar na datti dals verd-liberals per l'iniziativa da l'AUNS cun il titel "accords internaziunals avant il pievel" sco era per l'iniziativa per la promoziun dal respargn immobigliar. (fc/cdp)