Hockey: Svizra cumbatta encunter il Canada
-
- Zoom
- Il sivzzer Patrick von Gunten cumbatta per il puc encunter Martin Kariya dal Canada (keystone)
Suenter la terrada da 2:5 encunter la Finlanda al campiunadi mundial da hockey sin glatsch a Helsinki vul la naziunala Svizra puspè turnar enavos sin la via da success. Sin l’equipa da Sean Simpson spetga questa saira a partir da las 19:15 uras dentant in ulteriur grond caliber, numnadamain il Team Canada, il campiun olimpic da Vancouver.
Svizra persvada bain savens cunter il Canada
Encunter ils canadais han ils svizzers savens fatg ina buna figura ils davos onns. Als gieus olimpics da Turin il 2006 ha la naziunala Svizra battì il Team Canada cun 2:0. Igl è stà ina victoria istorica. Als davos gieus olimpics a Vancouver han ils svizzers pers encunter ils canadais be cun 2:3 suenter sajettar penaltis. Ad in campiunadi mundial han ils svizzers battì ina suletta gia il Team Canada, quai cun 4:1 al campiunadi mundial a Mannheim il 2010. In onn pli tard al campiunadi mundial a Kosice en la Slovachia hai lura dà ina stretga terrada da 3:4 suenter prolungaziun. Avant in’emna ha l’equipa da Sean Simpson dà ils davos gieus da test encunter ils canadais. Omaduas giadas han ils svizzers pers, ina gia cun 1:2 suenter prolungaziun, trais dis pli tard lura cun 2:4. (aw/rtr)
