Grischun: La stagiun da bogn ha cumenzà
-
- Zoom
- Il bogn avert Trü p.e.x. avra las portas da Tschuncaisma. (RTR, C. Josty)
Ils 11 da matg avran plirs bogns grischuns lur portas. Era il bogn avert Obere Au a Cuira. Cunquai che l'aua vegn stgaudada pon ins far quint cun ina temperatura da l'aua tranter 22 e 24 grads. Damaun avra era il bogn avert Fontanivas a Glion las portas. L'aua vegn stgaudada là cun indrizs solars ed ils responsabels quintan cun temperaturas enfin 20 grads.
Ils responsabels dals bogns averts han confirmà envers il Radio Rumantsch, ch'els hajan elegì il firà d’Anzainzas sco punct da partenza per la stagiun da bogn 2012. Intgins bogns han anc ina pre-sesiun, vul dir ch'els han avert sulettamain las fins d'emnas.
Avertura d'ulteriurs bogns en il Grischun
A Vulpera, en l'Engiadina Bassa (1250 m.s.m.) è il bogn averts per la populaziun a partir dals 30 da zercladur.
Il bogn avert Trü a Scuol che vegn stgaudà, avra sias portas da Tschuncaisma, ils 26 da matg.
A Bravuogn, en Val d'Alvra pon ins giudair l'aua en il bogn avert a partir da la fin zercladur.
Ils lais da nudar en il Grischun
A Savognin èn ils responsabels vid emplenir il Lai Barnagn. Atgnamain pudess ins gia far bogn en il lai. La sessiun vegn dentant averta uffizialmain ils 17 da matg.
Il lai Davos Munts a Vattiz en Surselva è averts a partir da damaun, ils 12 da matg, quai dentant sulettamain durant las fins d'emnas enfin ils 17 da zercladur.
Ed en in'emna pudess ins lura era siglir en il lai La Cauma a Flem, dentant èn las temperaturas là sut 10 grads. (ab/fc/rtr)
