Uschia haja la Spitex Foppa pudì meglierar l’effectiv dals meds liquids, cunzunt il dabun da la banca. Quai scriva Othmar Berni, il responsabel per las finanzas, en il quint annual da la Spitex Foppa.

Il quint da gudogn e perdita saja confurm al budget. Tar las expensas haja quai dentant dà intgins transferiments pervi da midadas en l’administraziun.

Las expensas da persunal èn stadas 138'000 francs pli bassas che previs en il budget. Las midadas en la direcziun sajan qua anc strusch s’effectuadas.

Las expensas per scolaziun èn sa reducidas. Il fond da scolaziun da l’associaziun ha sustegnì la Spitex Foppa cun 9000 francs.

Perquai che la dumonda da servetschs da pasts è creschida, èn era las epxensas per quest servetsch creschidas.

Tar il gudogn da manaschi èn ils posts da la tgira e da l’economia da chasa sa reducids per circa 5% visavi il budget.

Las contribuziuns dal chantun èn sa reducidas envers il budget per circa 24'000 francs. Quai engrevgescha las vischnancas. Quellas han uschia da pajar circa 17'000 francs dapli che previs.

(sm/rtr)