Las bleras terras vulan sfurzar la chanceliera tudestga Angela Merkel da rinforzar la politica da svilup. Barack Obama e Francois Hollande pretendan ina ferma agenda da svilup. La crisa da debits en l'Europa saja d'impurtanza per l'entira economia mundiala. Il messadi dals dus presidents: Merkel duai sa mussar pli generusa per spendrar la Grezia ubain la Spagna e per evitar che l'uniun monetara giaja en stgaglias.

Per l'emprima gia da la partida è il nov president franzos Francois Hollande. El ha annunzià da vulair sa dustar cunter mesiras da spargn memia rigurusas. Plinavant vulan ils schefs da las otg regenzas che fan part a l'inscunter er discurrer davart il cumbat encunter la fom e la protecziun da l'ambient. Gist suenter l'inscunter suprem dals G8 datti in grond inscunter da la NATO a Chicago. Là èn millis persunas idas sin via per demonstrar encunter il pli grond inscunter en l'istorgia da l'allianza militara. (sd/sda)