Sper prender posiziun a las rinfatschas ha l’uniun Surselva Romontscha era preschentà il quint. Il quint da gudogn e perdita serrà cun ina perdita da 14’593.25 francs. Quella perdita saja sa resultada tras la producziun dad ediziuns ed ulteriurs products da la Surselva Romontscha.

Per quest post ha l’uniun investì l’onn passà 33’719.20 francs. In da quests products è il cudesch “Romontsch – Ina schanza unica”. Quel haja l’uniun vendì per in pretsch reducì cun il savair, chi dettia uschia ina perdita. La finamira saja dentant stada quella, da derasar il cudesch tant sco pussaivel. Uschia Annalisa Cathomas, la presidenta da l’uniun Surselva Romontscha.

A chaschun da la radunanza generala ha la Surselva Romontscha plinavant decidì, da sa participar a la discussiun da tgi che duai daventar il proxim president da la Lia Rumantscha.

Alla fin ha l’uniun elegì dus novs commembers en suprastanza. Lea Berther remplazza Ursin Fetz che ha demissiunà. Simon Bundi è vegnì elegì spontan. Ils commembers han exprimì il giavisch da cumplettar la suprastanza cun in commember giuven. E cunquai ch’igl è sulettamain definì en ils statuts che la suprastanza sto almain dumbrar tschintg persunas, ma nagut din maximum, è l’uniun sa decidida, d’auzar il dumber dals commembers da la suprastanza sin otg. (sm/rtr)