La gruppa da lavur pretenda tranter auter ch’ins po vinavant bajegiar segundas abitaziuns cun letgs chauds en il Grischun. L’emprim stoppian ins dentant definir tge ch’in letg chaud muntia insumma. Saja quai gia ademplì cun 90 pernottaziuns ad onn u dovria quai dapli, per exempel 120 pernottaziuns, uschia la task force dal Grischun.

 

Decider libramain

 

Impurtant saja stà per la gruppa da lavur ch’il possess vegnia garantì, di il cusseglier guvernativ Hansjörg Trachsel. “Persunas ch’han in’abitaziun duain er en l’avegnir pudair decider libramain da quella, pertge uschiglio fiss il donn material per il territori da muntogna enorm grond”.

Tenor Hansjörg Trachsel vul la gruppa da lavur era ch'i saja vinavant pussibel da transfurmar las stallas ed ils uigls en vischnanca en segundas abitaziuns e d’engrondir u disfar segundas abitaziuns existentas per bajegiar segundas abitaziuns novas. Segundas abitaziuns duain er vegnir lubidas per finanziar renovaziuns u novs hotels.

 

 

Suttastritgà posiziuns

 

Era la discussiun dals represchentants politics, da diversas uniuns da l’economia u da las organisaziuns d’ambient n’han betg mussà blers novs aspects. Adherents ed adversaris han suttastritgà lur posiziuns enconuschentas e fatg attent ord lur vista sin risicos ed avantatgs che l’iniziativa ha per il Grischun e tut la Svizra.

 

Proxima gievgia s'inscuntra alura la gruppa da lavur naziunala. (gc/rtr)