Quai che pertutga dentant il temp suenter la saramentaziun da Christoph Blocher sco cusseglier naziunal n'èn las cumissiuns betg perina. La cumissiun dal cussegl dals chantuns è da l’avis che l'immunitad da Blocher na valia era betg per quest temp. La cumissiun dal cussegl naziunal sto ussa tractar anc ina giada lezza dumonda.

Nagina surpraisa per Blocher

Per il cusseglier naziunal Christoph Blocher sez è la decisiun da la cumissiun dal cussegl dals chantuns stada nagina surpraisa. “Cura ch’jau hai vis tgi ch'è tut en quella cumissiun, èsi stà cler ch'i dettia ina decisiun politica, i sa tracta gea era d’ina autoritad politica”, di Blocher en in’emprima reacziun. I saja stà ses duair da far attent sin ils affars da l’anteriur president da la banca naziunala svizra, Philipp Hildebrand.

A Christoph Blocher vegn rinfatschà d'avair instigà da publitgar datas confidenzialas. Quai ch'ha manà a la demissiun da Hildebrand. (gc/sda)