Vignetta na duai betg custar dapli che 70 francs
-
- Zoom
- La vignetta per charrar sin l'autostrada custa il mument 40 francs. (RTR, F. Belotti)
Il cussegl naziunal na vul betg ch’automobilists ston pajar en l’avegnir 100 francs per utilisar las autostradas. El è suandà a sia cumissiun ed ha refusà la proposta dal cussegl federal.
La vignetta d’autostrada na duai betg custar dapli che 70 francs. Quai ha il cussegl naziunal decis. Uschia vegniss generà bun 150 milliuns francs dapli entradas ad onn ch’enfin ussa. Ina vignetta da 100 francs procurass tenor experts schizunt per 275 milliuns francs supplementaras.
Gea ha il cussegl naziunal er ditg ad ina vignetta che vala be 2 mais. Quella è cunzunt previsa per giast che fan vacanzas en Svizra. La vignetta per 2 mais duess custar 40 francs. (gc/sda)
