Goffin è la gronda surpraisa dal turnier da quest onn. Atgnamain n’avess David Goffin gnanc dad esser da la partida al turnier da renum. El n’è numnadamain betg sa qualifitgà per il French Open. Sco Lucky Looser è Goffin dentant tuttina avanzà en il tableau principal e po uschia giugar a partir da las 14.30 cunter Roger Federer.

Per Stanislas Wawrinka cuntinuescha il turnier cun in auter caliber. Stanislas Wawrinka gioga a partir da 15.30 cunter Jo Wilfried Tsonga.

Nadal e Murray èn vinavant

Senza problems è Rafael Nadal sa qualifitgà per ils otgavelfinals. Rafael Nadal ha gudagnà la terza partida dal turnier cun 6:1, 6:3 e 6:4 cunter Eduardo Schwank da l'Argentina. En l’otgavelfinal spetga in ulteriur giugader da l’Argentina sin Rafael Nadal. Lura s'inscuntra Nadal cun Juan Monaco.

Er en l’otgavelfinal è il Scot Andy Murray. Murray ha battì Santiago Giraldo da la Columbia en 3 sets.

(gc/si)