Avant 100 onns è la fabrica da ponn a Trun vegnida fundada. Il medem onn sco la lingia da la Viafier retica tranter Glion e Mustér e sco la fabrica da palpiri a Landquart. Quels giubileums èn il motiv ch’i dat pliras festas ed exposiziun il proxim temp.

Ina da quellas exposiziuns ha lieu actualmain en il Museum da la Cuort Ligia Grischa a Trun. Fotografias, monduras, documents da reclama ed intervistas cun persunas che han lavurà là, dattan perditga da l’impurtanza dal manaschi durant plirs decennis.

L’exposiziun è in project da “GR Focus”, inizià da Severin Rüegg, Pascal Werner e Sandro Zollinger. Sper la lavur sur la fabrica da ponn Trun, han els era preparà in’exposiziun che pertutga la fabrica da palpiri a Landquart.

Cun lur projects vulan ils trais iniziants regurdar al svilup economic da las regiuns, mo era accentuar la rolla che las lingias da la Viafier retica han giugà en quest connex.

L’avertura da la regiun entras la viafier è stada in’impurtanta premissa per il svilup da la fabrica da ponn a Trun. Senza la viafier avess la fabrica stuì procurar il transport individual da sia rauba e quel na fiss probabel betg stà finanziabel.

L’exposiziun en la Cuort Ligia Grischa ha lieu fin ils 14 da fanadur 2012.

(fa/anr/rtr)