Las regiuns èn in nov construct politic. Sias cumpetenzas ston dentant anc vegnir definidas. Cun la refurma dal territori vul il parlament e la regenza simplifitgar la structura administrativa dal Grischun. Las regiuns duain correspunder geograficamain 1:1 als 11 districts actuals. Singulas midadas duai quai sulet dar tar il num: Uschia midass il district En ses num en Regiun Engiadina Bassa/Val Müstair.


11 regiuns e betg mo 8

Dispitas ha quai dà davart il dumber da las regiuns. La regenza vuleva oriundamain 5 fin 8 regiuns. La maioritad dals deputads è dentant stà da l’avis ch’i saja meglier da stgaffir 11 regiuns. La proposta dal deputà Bernhard Niggli (PBD) da furmar tuttina be 8 regiuns, n’ha gì naginas schanzas oz tar ils deputads. Els han cleramain refusà questa proposta - quai cun 105 cunter 8 vuschs.

 

 

Pievel decida

 

Sco proxim decida il suveran grischun davart la refurma dal territori. La data da la votaziun n’è betg anc fixada. Cler è dentant gia ussa: Il pievel decida en chaussa senza savair tge cumpetenzas che quellas regiuns duessan insumma avair. La nova structura dal chantun Grischun duess ir en vigur l’emprim da schaner 2015.
 

(gc/rtr)