Il tunnel dad autos tras il Gottard duess vegnir sanà a partir dal 2020. La sanaziun cuzzass bun 3 onns. Per il chantun Grischun vuless quai dir ch'i dess dapli traffic atras il San Bernardino. Perquai vul la regenza grischuna cumbatter per in segund tunnel al Gottard. Tenor il cusseglier guvernativ Mario Cavigelli sutvalitescha la confederaziun il mument il traffic supplementar che la sanaziun dal Gottard chaschunass per il Grischun. Blers charrassan numnadamain alura sur il pass dal San Bernardino. 

Cavigelli è optimistic

Malgrà ch’il suveran svizzer ha gia detg 2 giadas na ad in segund tunnel, crai Cavigelli che quest project ha tuttina schanzas da vegnir acceptà quella giada da la populaziun svizra. La situaziun da partenza dals onns passà na saja betg da cumpareglià cun ussa, uschia Cavigelli.

Il chantun Grischun lobiescha a Berna en stretga collavuraziun cun ils auters chantuns dal Gottard per in segund tunnel. (gc/rtr)