La Spagna trametta a chasa l’Irlanda
-
- Zoom
- Fernando Torres è stà l’um dal gieu encunter l’Irlanda. (Reuters)
La Spagna, il defensur dal titel, ha festivà l’emprima victoria al campiunadi europeic da ballape. En la gruppa C han ils spagnols declassà ils irlandais gist cun 4:0 ed han uschia fatg il pass a la testa da la tabella.
La Spagna ina numera memia gronda per l’Irlanda
La Spagna che veva giugà en l’emprim gieu be pari 1:1 encunter l’Italia ha mussà ina reacziun en il segund gieu. Encunter ils talians vevan ils spagnols giugà senza in attatgader. Encunter ils irlandais ha il trenader spagnol Vincente del Bosque laschà dà Fernando Torres a partir da l’entschatta. Igl attatgader da Chelsea ha nizzegià sia schanza e gist sajettà dus gols. Ils ulteriurs gols han sajettà Silva e Fabregas. Ils spagnols han dominà il gieu dad A fin Z e vessan gì la schanza da gudagnar cun in anc pli aut resultat.
Campiunadi a fin per l’Irlanda
L’Irlanda che vegn trenada dal talian Giovanni Trapattoni ha era pers il segund gieu da gruppa. Cunquai è il campiunadi europeic gia a fin per ils irlandais suenter la fasa da gruppa. En il davos gieu da gruppa frunta l’Irlanda sin l’Italia ch’astga anc sperar da sa qualifitgar per la fasa da K.O. La Spagna frunta en il davos gieu da gruppa sin la Croazia. (aw/sda)
