Gronda tensiun avant davos gieus da gruppa
-
- Zoom
- En il stadion da Lwiw dattan questa saira il Danemarc cunter la Germania. (Keystone)
En la gruppa B vegni questa saira al grond showdown. Tut las quatter equipas han anc la schanza da sa qualifitgar per ils quarts finals. Las meglras cartas ha perencunter la Germania ch’ha sco suletta equipa gudagnà omadus gieus da gruppa. Ils Tudestgs fruntan questa saira sin il Danemarc.
Ad in gieu final vegni en il duel tranter il Portugal e l’Ollanda. Per ils Ollandais vai per tut u nagut, suenter las duas terradas encunter il Danemarc e la Germania.
I fiss l’emprima giada dapi 32 onns ch’ils Ollandais na cuntanschessan betg la fasa da K.O. ad in campiunadi d’Europa. L’Ollanda sto mussar questa saira in ballape offensiv. Perquai lascha il trenader Bert van Marwijk pli probabel giugar Klaas-Jan Huntelaar e Robin Van Persie a partir da l’entschatta. Il Portugal spera sin gols da ses star Cristiano Ronaldo.
La statistica pleda per ils Portugais. Da diesch duels encunter ils “Oranje” han ils Portugais pers be in enfin oz. Tranter auter ha il Portugal battì l’Ollanda en il mezfinal dal campiunadi d’Europa 2004 ed en l’otgavel final dal campiunadi mundial 2006. (aw/rtr)
