L'iniziativa “atgnas quatter paraids grazia al respargn immobigliar” da l’Associaziun svizra dals proprietaris da chasas (APC Svizra) ha fatg cleramain naufragi.

68,9% da las votantas e dals votants han refusà l'iniziativa che vuleva pussibilitar a mintgin da deducir mintg’onn fin a 10’000 francs da la taglia: pèrs maridads schizunt 20’000 francs. Entaifer 10 onns avessan ils interessads alura stuì bajegiar u cumprar in’atgna abitaziun u chasa cun quests daners ch’els han gì spargnà.

Gmür è trumpà

Cun in uschè cler resultat n’haja el betg quintà, di il directur da l’Associaziun svizra dals proprietaris da chasas, Ansgar Gmür. “Noss’iniziativa è stada in regal als locataris, dentant els han refusà quel”, ha Gmür ditg. Uschia vegnia quai er ad esser per blers en l’avegnir grev d’ademplir il giavisch d’in agen da chasa.

Na pervia da scuidanza

Che blers locataris hajan ditg na a l’iniziativa, argumentescha Gmür cun la scuidanza. Persunas che na possian betg prestar in'atgna chasa u abitaziun, na veglian er betg ch’autras possian far quai.

Nagin basegn da promover

Per la presidenta da la confederaziun, Eveline Widmer-Schlumpf mussa quest na dal pievel svizzer entaifer curt temp ch’i na dovria nagina deducziun da taglia per il respargn immobigliar. En Svizra na paria quai betg da dar in basegn da promover proprietad d’abitar cun il sistem da taglia, ha Widmer-Schlumpf ditg en vista a la votaziun per l’iniziativa “Viver segir en la vegliadetgna” ch'è proxim settember.

Cler na dal Grischun

Er il suveran grischun refusa l’iniziativa. 69,5% dals votants din na a l'iniziativa per in respargn immobigliar. La participaziun a la votaziun è stada plitost bassa cun bun 32%. (gc/rtr)