Tschients e-mails da la populaziun hajan motivà el da cuntinuar. Plinavant na giaja la cuntraproposta indirecta dal parlament betg lunsch avunda. Probabel decida il suveran svizzer ils 25 da november 2012 davart l'iniziativa cunter raffaders che pretenda ch'ils cussegls d'administraziun vegnian elegids mintg'onn e ch'ils acziunaris possian decider davart las pajas e bunificaziuns. Plinavant vul l'iniziativa da Minder scumandar indemnisaziuns da partenza per il cader, uschenumnads paracrudaders d'aur.

Reacziun economiesuisse

L'associaziun da l'economia svizra cumbatta l'iniziativa Minder en favur da la cuntraproposta. L'iniziativa saja memia birocratica e giaja memia lunsch, uschia economiesuisse. La Svizra avessi uschia il dretg d'aczias il pli restrictiv dal mund, quai che restrenschia il svilup da l'economia, anzi pericliteschia quel.

La cuntraproposta saja meglra e funcziuneschia pli spert. La primavaira aveva il parlament deliberà la cuntraproposta indirecta cun gronda maioritad, che dat dapli dretgs als acziunaris ed ademplescha, tenor economiesuisse, 80 % da las pretensiuns da l'iniziativa da Minder.

Reacziuns da las partidas

Ils cristiandemocrats ed ils liberaldemocrats han annunzià da vulair cumbatter l'iniziativa. La cuntraproposta indirecta, approvada dal parlament, saja meglra ed adempleschia gia 80% da las pretensiuns. Ils auters 20% restrenschia memia fitg l'economia svizra.

Tuttina era ils liberaldemocrats. La cuntraproposta adempleschia gia 80% da las pretensiuns da l'iniziativa ed ils auters 20 sajan nuschaivels per l'economia svizra.

Auter ils socialdemocrats. Per quests va l'iniziativa memia pauc lunsch. I manchia la taglia sin bonitads. Ella vul sustegnair l'iniziativa dals socialdemocrats giuvens che pretenda ina relaziun da paja maximala da 1:12, tranter cader e collavuraturs. (aw/fc/sda)