Sco quai che la polizia chantunala ha communitgà, èn l'emprim dus autos collidads sin la via dal Rossboden. Enstagl da s'occupar da l'accident è in automobilist charrà vinavant. Retschertgas han mussà ch'il numer da l'auto era engulà.

Cura che la polizia da la citad da Cuira ha pauc pli tard vulì controllar in auto che sumegliava l’auto da fugia, è quel charrà vinavant senza resguardar ils segns da la polizia.

Suenter curt ha quest auto chaschunà in ulteriur accident. El è collidà frontalmain cun in candelaber. L’automobilist è fugì a pe, la polizia ha dentant pudì arrestar el suenter 50 meters.

Anc al lieu d’accident èsi sa mussà ch’i sa tracta dal medem vehichel ch’era sa participà a l’accident al Rossboden. Tar il segund accident eran dentant montads auters numers, puspè numers engulads.

(fa/pocha gr)