Simone Niggli ha gudagnà la cursa sur la distanza lunga en in temps dad 1:15:07. Minna Kauppi da la Finlanda, campiunessa mundiala sur la distanza media, ha pers gia 1:31 minutas sin Niggli. La medaglia da bronz ha gudagnà la svedaisa Annika Billstam, ella ha pers passa 2 minutas sin Simone Niggli. Las duas ulteriuras Svizras; Ines Brodmann è vegnida 9avla, Sara Lüscher ha stuì sa cuntentar cun il 11avel plaz.

Sonda, ils 21-7-2012, ha Simone Niggli la schanza da gudagnar sia 20avla medaglia d’aur a campiunadis mundials. Sin il program stat la cursa da staffetta.

Argient per Matthias Merz

Ina medaglia hai era dà en la cursa dal umens sur la distanza lunga. Matthias Merz, che veva gia gudagnà argient en il sprint, è ussa era vice-campiun en la distanza roiala. Aur ha gudagnà a moda suverana il norvegiais Olav Lundanes. Il norvegiais è stà bunamain trais minutas pli sperts che Merz (+2:52). Terz cun in retard da bun 4:31 minutas è vegnì Edgar Bertuks da la Lettonia. Il campiun mundial en il sprint, il svizzer Matthias Kyburz, ha gì nagina schanza ed è vegnì 19avel.

Tut en tut ha Matthias Merz ussa gia gudagnà 9 medaglias a campiunadis mundials, 5 medaglias en ina disciplina singula.

Finamira è gia cuntanschida

Grazia a la medaglia d’aur da Simone Niggli e quella d’argient da Matthias Merz ha la delegaziun svizra gia gudagnà 7 medaglias al campiunadi mundial da cursa d’orientaziun a Losanna, e quai avant las duas cursas da staffetta nua che la Svizra parta ton tar las dunnas sco era tar ils umens sco gronda favurita. (aw/sda)