Annan condemnescha attatga a Damascus
-
- Zoom
- Kofi Annan appellescha al cussegl da segirtad d'agir. (Reuters)
L'incumbensà spezial da l'ONU, Kofi Annan, ha condemnà l'attatga a Damascus en la Siria ed intimà il cussegl da segirtad d'agir. Il cussegl da segirtad da l'ONU ha spustà la votaziun sur d'ina resoluziun nova pertutgant la Siria davent da mesemna sin oz.
Trais represchentants auts morts tar attatga
Tenor diplomats dal Vest han ins vulì stgaffir uschia dapli spazi d'agir per tractativas novas. Pervi da l'attatga cun bumba a Damascus èn morts ier trais represchentants d'aut grad da la Siria: Il minister da la defensiun, ses substitut ed il quinà dal president Baschal al-Assad.
Passa 200 morts
En la Siria sajan vegnidas mazzadas la mesemna, ils 18-07-2012, passa 200 persunas. Tranter las unfrendas eran era 120 civilists. Quai annunzia il post d'observaziun sirian per ils dretgs umans cun sedia a Londra. Mo en la chapitala da Damascus haja dà 38 unfrendas. (sd/sda)
A Damascus, la chapitala da la Sira, cuntinueschan ils cumbats. Ier sajan mortas almain 20 persunas pervi da cumbats tranter truppas da la regenza e rebels, quai ha communitgà l'organisaziun sirica per la protecziun dals dretgs umans.
dapli Chapitala Damascus na vegn betg a ruaus
