“El na saja betg fit avunda per sa participar”, ha ditg Rafael Nadal ed ha declerà questa decisiun sco in dals pli trists muments da sia carriera. Nadal fiss stà ensemen cun Roger Federer e Novak Djokovic in dals gronds favurits sin il titel. El avess era astgà purtar la bandiera spagnola a la festa d’avertura dals gieus olimpics 2012.

Wimbledon na porta betg cletg a Nadal il 2012

Il turnier da tennis vegn giugà a Wimbledon. Era sin pastg veva Rafael Nadal mussà sia gronda classa ils davos onns. Il 2008 ed il 2010 ha el gudagnà il Grand Slam da Wimbledon. Quest onn è Nadal dentant gia crudà ora en la segunda runda encunter il tschec Lukas Rasol. Silsuenter ha el stuì far pausa pervia d’ina blessura vid il schanugl sanester, quai schanugl che fa dapi onns quitads al giugader da tennis spagnol. Rafael Nadal ha plinavant menziunà ch’el lessi uschia dar la schanza ad in ulteriur giugader spagnol che saja fit da sa participar als gieus olimpics a Londra. (aw/sf)