Persunas duajan vegnir integradas en il mund da lavur
-
- Zoom
- Era persunas cun impediments duajan pudair luvrar e vegnì integrads uschia pli fetg en il mund da la lavur. (Keystone)
Integrar en il mund da lavur persunas che retiran ina renta d'invaliditad, quai è la finamira da la 6avla revisiun da l'AI ch'è ida en vigur il cumenzament da l'onn 2012. L'Assicuranza sociala dal chantun Grischun ha preschentà oz a Cuira co questa revisiun duai vegnir realisada en la pratica.
-
- Zoom
- Tar la sesida da l’assicuranza sociala. Da san.: Jürg Zimmermann, Josef Nauer, Dr. Christoph Ruef, Samuel Flury e Otto Fischli. (RTR, N. Cadonau)
Integraziun enstagl renta
Surtut persunas giuvnas cun ina scolaziun duajan far il pass en il mund da lavur. Ellas han la pussaivladad da far durant 6 mais ina "emprova da lavur" tar ina firma per rimnar experientschas. La finamira fiss lura, d'integrar questas persunas a lunga vista en il mund da lavur.
Ils patruns ch'èn pronts d'engaschar persunas che retiran ina renta d'invaliditad, survegnan sustegn dal chantun. Uschia na sto la firma betg pajar la paja u garantir naginas assicuranzas - questas prestaziuns surpiglia la segirada sociala per il temp d'emprova da 6 mais.
Ils proxims 6 onns vul l'Assicuranza sociala dal chantun Grischun integrar en il mund da lavur 400 persunas che retiran actualmain ina renta d'invaliditad - natiralmain era per spargnar custs. (nc/sd/rtr)
