Mexico schochescha la Brasilia e gudogna aur
-
- Zoom
- Mexico gudogna cunter ils Brasilians cun 2:1. (Reuters)
Il Mexico è per l’emprima giada campiun olimpic da ballape. Ils Mexicans han battì en il final olimpic en il stadion da Wembley il grond favurit, la Brasilia, cun 2:1. L’um dal gieu è stà il mexican Oribe Peralta, che ha sajettà omadus gols per il Mexico.
La Brasilia sto spetgar vinavant sin l’emprim titel da campiun olimpic. Gia il 1984 a Los Angeles (0:2 encunter la Frantscha) ed il 1988 a Seoul (1:2 encunter l’Uniun Sovieta) avevan ils Brasilians pers il final e stuì sa cuntentar cun argient.
Il pli spert gol en l'istorgia dals gieus olimpics
Il final a Londra ha cumenzà optimal per il Mexico. Gia suenter 29 secundas ha Oribe Peralta sajettà il 1:0. Quai è stà il pli spert gol en l’istorgia dals gieus olimpics dapi il 1976. Era silsuenter n’han ils Brasilians betg pudì prender il gieu en ils agens mauns. Suenter 67 minutas ha Oribe Peralta pudì sajettar il 2:0. Il sulet gol dals Brasilians è crudà entras Hulk en la 91avla minuta, memia tard per anc volver il gieu.
Medaglia da bronz
La medaglia da bronz ha la Corea dal Sid gudagnà. Ils Sidcoreans han gudagnà il final pitschen, il gieu per il terz e quart plaz, encunter il Giapun cun 2:0. (aw/fc/rtr)
