Regenza vul rinforzar chantun sco lieu per scolas autas
-
- Zoom
- Scolas autas ed ils instituts da perscrutaziun duain er en il futur profitar da contribuziuns federalas.
(RTR, T. Demund)
La regenza grischuna vul rinforzar il Grischun sco lieu per scolas autas e vul promover la perscrutaziun en il chantun per mantegnair e generar plazzas da lavur qualifitgadas. Perquai ha ella deliberà per mauns dal cussegl grond il messadi per ina lescha per las scolas autas e la perscrutaziun.
Realisar 3 mesiras centralas
Il chantun stgaffescha cun la nova lescha primo ina basa legala unitara per scolas autas e per lieus da perscrutaziun ch'existan gia. Sin basa d'ina strategia chantunala vegnan las scolas autas e la perscrutaziun promovidas da nov en moda unitara cun agid d'incaricas da prestaziun e da contribuziuns globalas.
Secundo vegni garantì ch’iniziativas novas en il sectur da las scolas autas e da la perscrutaziun pon vegnir sustegnidas.
Terzo adatta il chantun ses instruments da perscrutaziun a la legislaziun federala revedida e garantescha uschia ch'il Grischun sco lieu da scolas autas e da perscrutaziun survegn er en l'avegnir meds finanzials federals.
Parlament decida l'october
Il 2008 aveva il parlament surdà a la regenza l'incarica d'elavurar ina tala lescha. Quella è ussa sin maisa è vegn tractada dal cussegl grond en la sessiun d'october.
(gc/gr.ch)
