Radio
Emissiuns dad A fin Z
Qua datti la survista da las rubricas ed emissiuns dal Radio Rumantsch en successiun alfabetica cun ina curta descripziun tge ch'i dat mintgamai d'udir.
A
Actual la damaun (gli-so 6.00-9.00) / da mezdi (gli-ve 11.00-13.00) / la saira (gli-ve 17.00-19.00)
La damaun, a mezdi e la saira rapporta il Radio Rumantsch da quai che capita sin noss mund - dal mund local en nossas vals enfin sin il livel internaziunal. Nus infurmain, declerain, approfundain ed analisain. Nus raquintain a vus tut las istorgias actualas e relevantas or dals champs politica, economia, cultura, ambient, societad, sport e boulevard. Tenor noss motto: "Taidlas bler - vesas cler!"
Album da l'emna (gli-du 21.15)
Mintg’emna preschentain nus in disc cumpact ch’è gist cumparì sin fiera.
Artg musical (du 14.03 / rep. gli 22.03)
L’Artg musical è in caleidoscop da tut quai che capita en la scena da musica en Svizra rumantscha, en il Grischun e sur ils cunfins da quel ora. Tadlai las pli novas registraziuns dal Radio Rumantsch, intervistas cun cumponists ed interprets e las istorgias da davant e davos ils palcs da concert.
B
C
Chalender (gli-du 9.15)
En il chalender vegnan menziunads ils eveniments che vus avais annunzià al Radio Rumantsch.
Concert sin giavisch (du 9.30-10.00)
Vus pudais trametter voss giavischs per posta u via internet ubain telefonar directamain en l'emissiun.
D
E
F
Famus e glorius (gli-ve 10.30)
Ha Lara Gut in nov ami? Tgi dal cussegl federal stuess puspè ina giada ir tar il coiffeur? E passenta la famiglia roiala da l’Engalterra sias vacanzas d’enviern era quest onn a Claustra? Famus e glorius, la revista da medias che fa concurrenza als collegas da «Glanz & Gloria».
Forum (du 12.30 / rep. ve 20.03)
Persunas dal fatg preschentan, decleran, analiseschan e reflecteschan durant 30 minutas fenomens, svilups e dumondas da la vita e da la societad.
G
Gratulaziuns (gli-du 13.00) e la cuppina (gli-du 9.05)
Las gratulaziuns èn in punct apprezià da las audituras e dals auditurs dal Radio Rumantsch.
La gratulaziun spontana dat la pussaivladad da gratular gia l’avantmezdi ad insatgi e da laschar regalar il Radio Rumantsch ina cuppina/a la giubilara u al giubilar.
Grischun sonor (gli-du 23.03-1.00 e 5.00-6.00)
En las uras da Grischun sonor è la musica deditgada cumplainamain al Grischun. Davent da chors enfin musica da pop grischuna preschenta la redacziun da musica da RR l’entira paletta da quai che noss chantun porscha en il sectur da musica.
H
I
Il chavazzin dal di (gli-so 8.40)
Tge è in Tsunami propi? E pertge discurran tuts dal secret da bancas, senza savair tge che quai è propi? Il chavazzin dal di dat respostas, respostas sin pleds che fan il gir, respostas sin fenomens e schabetgs actuals. Nus declerain e dain infurmaziuns supplementaras. Per ch’i dettia tar vus mintgadi in "a-ha".
Ils auters (so 12.06)
Correspundentas rapportan da quai che ha muventà, fatschentà ed occupà vischinas e vischins en Svizra tudestga, franzosa e taliana.
Impuls dal di (gli-du 5.55 / rep. gli-so 10.55)
Cun lur impuls persunal dattan persunas da differentas professiuns, da differenta vegliadetgna e da differenta derivanza in impuls che po accumpagnar tras il di.
J
K
Kikeri6 (gli-so 7.40)
È Rio de Janeiro la chapitala da la Brasilia? Gea u na? È Dario Cologna oriund da la Val Müstair? Gea u na? In candidat u ina candidata ha da respunder 6 giadas correctamain, 6 giadas aifer 60 secundas, 6 giadas enfin tar il kikeriki final! Da gudagnar datti 6 lottarias da Swisslos ubain l’entir jackpot.
L
La classica (du 10.03 / rep. 19.00)
Emissiun cun musica ord la sparta classica. L’emissiun ha in fil cotschen tematic sco p.ex. in giubileum, in mortori, in'actualitad u in fenomen musical, ella po er preschentar inA musicistA u ina gruppa da persunas.
L'instrumentala (me 19.00 / rep. gie 22.03)
L’emissiun preschenta furmaziuns da brass, armonias, fanfaras, musicas militaras, furmaziuns pitschnas, giubileums da Brass Bands u autras furmaziuns, anniversaris u eveniments actuals. L’emissiun preschenta er las capo-furmaziuns da quel gener da musica.
La populara / da qua e da là (gie 19.00 / rep. ve 22.03
La musica populara dal Grischun e da la Svizra chatta ses lieu en questa emissiun.
Il da qua e da là preschenta musica populara da l’entir mund.
La stailalva (gli 19.00 / rep. ma 22.03
Musica da la sparta schlagher e schlagher popular e preschentaziun da musica nova, semperverds, da giubileums, hits, temas actuals, anniversaris u eveniments.
La truvaglia (gli-so 9.30)
Noss expert da musica va a la tschertga da tocs da musica in pau pli spezials e ch’ins n’udiss uschiglio strusch en il program da musica quotidian. Latiers datti lura mintgamai era d’udir l’istorgia da l’interpret, cumponist u dal toc sez.
Las perlas (ve 19.00 / rep. so 22.03)
In’ura da musica tipisada, liada ad in tema specific, cun tendenza «istorica». Quai po esser in anniversari rodund ubain il mortori dad ina corifea, quai po esser il giubileum dad in album, d’in stil u d’in fenomen musical istoric, quai po esser in chavazzin casual, quai po er esser la cumparaziun da diversas interpretaziuns da chanzuns «classicas».
M
Magazin da cultura (so 10.03 / rep. gli 20.03)
Il magazin da cultura preschenta e spievla la cultura grischuna/rumantscha a moda profunda, reflectanta, prospectiva e da "longue durée". Litteratura, architectura, art, saut e musica - il magazin da cultura tracta tut las spartas culturalas. Supplementarmain datti er tips per eveniments e publicaziuns ch’ins na dastga betg manchentar.
Marella (du 11.03 / rep. ma 20.03)
L’emissiun focusescha e reflectescha in tema. Ella dat in cuc davos las culissas, explitgescha e metta en context, saja quai fenomens novs e nunenconuschents, ubain istorgias che paran a prima vista enconuschentas.
Musica populara (gli-du 3.03-5.00)
Durant 2 uras lascha il Radio Rumantsch resunar musica populara dal Grischun e da l’entira Svizra.
N
Noss chors (ma 19.00 / rep. me 22.03)
En l’archiv da musica dal Radio Rumantsch èn da chattar nundumbraivlas registraziuns da chors - en spezial chors rumantschs e grischuns. Tadlai e giudai!
O
P
Palaver (so. 12.30 / rep. 20.03)
Emna per emna debatteschan Mariano Tschuor, directur RTR, e Gian Ramming, schefredactur RTR davart in u plirs temas actuals. Cun u senza in giast, ma adina in disput argumentativ, cuntravers e commentond.
Parada da hits (so 14.03)
Emna per emna emetta il Radio Rumantsch sco emprim emettur da radio en Svizra la parada da hits actuala.
Profil (so 11.03 / rep. me 20.03)
Durant in’ura porscha il Profil biografias, destins, istorgias ed experientschas dad umens e dunnas, giuven e vegl, da prominents u simplamain da persunas ch’han da dir e da raquintar insatge. Durant ils ultims 25 onns ha il Profil laschà vegnir a pled var 1’300 persunas, ed anc adina n’èsi nagin problem da preschentar sonda per sonda novs giasts interessants.
Q
R
Radioarchiv (du 15.03 / rep. gie 20.03)
Ils archivs dal Radio Rumantsch èn voluminus e cuntegnan bleras emissiuns d’antruras. Ina giada per emna vegn l’archiv avert per laschar reviver il temp e las vuschs d’antruras.
Radionovela: Vita capita (gli-ve 10.15 / rep. du 7.06)
Si en las muntognas datti ina vischnanca - Surgonda. Ed a Surgonda stattan era ils Caflischs, ina famiglia che viva dapi generaziuns a Surgonda. Ma tgi èn ils Cafilschs? E tgi èn ils abitants da Surgonda? Tge èn lur plaschairs e pensiers? E pertge ston els mintgatant rir e cridar en ina? - “Vita capita”: ina radionovela che fa bain e mal al cor.
Revista da medias (gli-du 6.40)
La revista da pressa da las gasettas grischunas e da las pli impurtantas gasettas da la svizra. Legidas da nus per vus avant ch’ellas èn en vossa chascha da brevs.
S
Semperverds (gli-du 16.15)
Semperverds ubain evergreens emettain nus mintga di tranter las 16.15 e las 16.45. A la fin datti il gieu «Verd per semper» cun ina dumonda che sa referescha a las infurmaziuns gist udidas.
Soundcheck (so. 19.00 / rep. du 22.03)
L’emissiun preschenta musica nova e guarda sin eveniments/concerts e tendenzas en la scena da musica grischuna, naziunala ed internaziunala.
Sportissimo (so 17.06 / du 12.06 e 17.06)
RR infurmescha actual e cumpetent da tut ils temas che pertutgan il sport. Sportistas e sportists dal Grischun ed occurrenzas da sport en nossa regiun han prioritad en las emissiuns da sport da RR.
T
Tge chaussas (gli-so 9.45)
Sin fundament da chavazzins stuais vus engiavinar "Tge chaussa" che nus tschertgain. Mintga di vegnan resguardads 5 telefons cun propostas. Sche nagin sa la resposta correcta van ils 10 francs en il jackpot ed il di suenter datti ils medems chavazzins. Uschia vegn cuntinuà ed il jackpot cun daners crescha fin ch'insatgi sa la dretga resposta.
U
V
Vita e cretta (du 8.06 / rep. 20.03)
L’ura da religiun è ina oasa da tempra religius-meditativa. Cuntegn: verset meditativ-religius, predi/meditaziun, novitads or dal mund da las religiuns, contribuziun davart rituals, dumondas fundamentalas da la vita umana, discussiuns etic-religiusas u ils temas che fatschentan actualmain la differentas baselgias. Ils impuls da la dumengia concludan l’ura.
