Stefanie Heinzmann - Stefanie Heinzmann

L'onn 2007 è Stefanie Heinzmann sa participada ad ina concurrenza da musica iniziada da Stefan Raab. Cun gudagnar questa concurrenza ha la vallesana survegnì in contract tar la firma da plattas Universal Music. Curt suenter ha ella edì ses emprim album “Masterplan”. Cun quel ha Heinzmann retschet l'onn 2009 dus "Swiss Music Awards" ed in "Echo" per la meglra artista en la categoria rock/pop. Suenter blers concerts ed il segund album "Roots To Grow" ha la giuvna da 23 onns fatg ina pausa per sa remetter da la gronda travaglia dals ultims dus onns.

Ussa è la chantadura da return cun in album numnà "Stefanie Heinzmann". Gia l'emprima chanzun "Fire" ans dat in presentiment tge ch'ans spetga sin il nov portatun: in svilup fitg positiv! E l'album cuntinuescha gist cun in hit, l'enconuschent "Diggin' In The Dirt" tar il qual ins na po strusch star quiet. Il pli tard tar "Everyone's Lonely", ina cumposiziun da Jamie Cullum, èsi cler che “Stefanie Heinzmann” cuntegna bunischmas chanzuns e vegn quest onn senza dubi a procurar per blers hits. Puncts debels na datti betg: il nov album da Stefanie Heinzmann è propi ludaivel. Spezialmain per fans da Joss Stone e Pink è quest album ina necessitad!
Redacziun: Roland Vögtli