Willie Nelson - Heroes

Il chantautur american Willie Nelson è enconuschent sco in dals gronds "outlaws" da la musica country, in spiert rebellic, anarchistic entaifer ina comunitad che dissegna gugent munds intacts. Tant dapli èsi admirabel sco che quest tat dad oramai 79 onns sa mussa, sin ses nov album "Heroes", avert ed alert, embratschond stils e generaziuns, atmosferas e melodias. Nelson envida ina rotscha giasts da tuttas vegliadetgnas e scenas, il veteran Ray Price, ses figls Lukas e Micah, il rappunz Snoop Dogg, la rockadura Sheryl Crow euv. Ed el tscherna chanzuns da tuttas èras e dad auturs variants, dal swing dals onns 30 enfin tar il rock dal 2000, da Tom Waits enfin tar ils Coldplay. Ma al cuntrari da las ovras tardivas da ses ami barmier Johnny Cash lascha el cular en l‘entira ritgezza dal genre nashvillian, il "twang" da las ghitarras electricas, il giubilim da la pedal-steel, il gospel dals chors mixts, che portan e sustegnan la tipica tempra nasala dal vegl Willlie, senza mai crudar vi en il kitsch. Ina vaira capolavur tardiva, quests "Heroes" da Willie Nelson.
Redacziun: Benedetto Vigne