Patent Ochsner - Johnny - The Rimini Flashdown Part II

Davent da l'emprim tact èsi cler tgi che stat davos "Johnny - The Rimini Flashdown Part II": Patent Ochsner, la band cun il num che deriva d’ina inscripziun sin ina sadella da rument.

Dapi lur ultima publicaziun èn passads quatter onns. Per Büne Huber, il chantadur da la band, in temp difficil nua ch’el ha patì sut la separaziun da sia partenaria ed è crudà en ina fora creativa.

Chanzuns sco "Kreissal", "Guet Nacht, Elisabeth" e "Vermisst" tractan precisamain quests temas. Büne Huber, l’observader, raquinta istorgias d'amur, da separaziun e da novas entschattas. Trasora smirvegl’ins nua ch’el va per las bellas frasas che dattan da pensar a mintg’auditur(a).

Sin "Johnny - The Rimini Flashdown Part II" na chatt’ins betg grondas innovaziuns, igl è dentant bel da puspè udir la musica frestga e tipica da Patent Ochsner. L'otgavel album dals Bernais tutga en la collecziun da discs da fans e da glieud ch’è pronta da daventar in tal. Sco tip per questa stad; ils 14 da fanadur suna Patent Ochsner al Gurten Festival a Berna.
Redacziun: Roland Vögtli