Regina Spektor - What we saw from the cheap seats

Ditg curt, l’album "what we saw from the cheap seats" è:
Ina vusch ch’ins renconuscha suenter l’emprim tun.
Ina maniera da sunar che tradescha che la pianista ha fatg studis classics da clavazin.
Arranschaments dramatics che dattan adina puspè invista en il mund magic da la Regina Spektor.

Blers èn stads surstads cura che l’artista ha annunzià ch’ella produceschia ses sisavel album cun il producent Mike Elizondo (Dr. Dre, Eminem etc.).

Uss è quest album finalmain en las stizuns ed ins po dir che la collavuraziun saja grategiada! Cun "what we saw from the cheap seats" regala Regina Spektor a nus in album cun pop interessant e frestg, senza dentant perder sias atgnadads artisticas. En "Oh Marcello" chanta ella per exempel englais cun in accent talian, u en "Open" fa ella cun la vusch ramurs d’aspiraziun che fan bunamain mal da tadlar.

Cun l’artista èsi sco cun sia musica; dapli ch’ins auda ella e pli gugent ch’ins ha ella! E tgi che vul vesair (la) Regina live: ils 20 da fanadur sa preschenta ella a Lucerna al Blue Balls Festival.
Redacziun: Astrid Alexandre