Michael Bublé - To Be Loved

El ha 37 onns ed è ina da las grondas vuschs da la musica da pop. Il chantadur canadais Michael Bublé è in da quels che san procurar per pel giaglina, per vibraziuns - ed er sch’el ha vendì 40 milliuns discs è el restà in tip modest e calm, dentant adina er spiertus e divertent e fitg simpatic... il siemi da bleras dunnas e giuvnas. Però dapi il 2011 è el maridà cun l’actura argentina Luisana Lopilato ed els dus han uss ina figlia da 4 mais. "Esser bab è ina experientscha fantastica", di Michael Bublé, e quai ha er consequenzas per sia lavur sco musicist. El saja plain energia e forza, haja curaschi e gronda segirtad.

Ses album nov, ses 8avel, è plain pop, swing e schizunt soul, in album à la Phil Spector ch’aveva producì bleras bands da la fin dals onns 60 sco las Ronettes, ils Crystals ubain ils Righteous Brothers. Bublé fa in artg cun la musica dals onns 50, 60 e 70, cun classichers ch’el re-interpretescha, chanzuns da Frank Sinatra, Smokey Robinson ed er da Elvis Presley, ed el fa quai en sia moda incumparabla e cun grond scharm. 4 da las 14 chanzuns chanta el cun giasts: cun la gruppa vocala Naturally 7 e cun las Puppini Sisters. Per ina chanzun, il grond semperverd “Something Stupid”, ha el chattà a Reese Witherspoon sco partenaria da duet. E cur che Bublé chanta cun ses cumpatriot Bryan Adams vegn tut er anc in pau pli rockus.

Che Michael Bublé è in dals gronds chantadurs demussa er il fatg ch’ils bigliets per ses 10 concerts ch’el dat questa stad a Londra èn stads vendids entaifer 4 minutas.

Redacziun: Jachen Prevost