Sin l’emprim album da Yoann Lemoine han ins stuì spetgar ditg - l’emprima single (“Iron”) aveva gia fatg gizzar nus las ureglias en il 2011! E dapi lura tegnan ils fans lur flad e speran che l’album tegnia quai che la single empermetta! Cuzzà uschè ditg ha la producziun perquai che Yoann Lemoine è stà occupà cun ses job principal: far reschia da clips da video (quai dal reminent per artistas sco Lana Del Rey (“Born To Die” & “Blue Jeans”), Katy Perry (“Teenage Dreams”) u era Rihanna (“Take Care”)).

Uss è “The Golden Age” dentant qua, quest album ch’il franzos Yoann Lemoine ha edì sut ses num d’artist Woodkid. Ed ils fans n’han betg spetgà per nagut!

La vusch bassa da Woodkid fa pel-giaglina e sa maschaida baud cun in vegl clavazin (“Boat Song”), baud cun ils tuns pompus d’in orchester (“I Love You”) u era cun instruments da sturs che fan in zic endament musica dal Balcan (“Iron”). Quasi mintga chanzun da l’album cumenza en moda innocenta e fina, sa sviluppescha lura dentant en moda pompusa per finir en quai ch’ins pudess numnar “musica da film”, uschè ferms èn ils maletgs ch’ella sveglia en noss chaus.

Questa musica n’è betg insatge “levet” per laschar ir davostiers! Ella tutga en il viv ed è magari uschè intensiva ch’i fa bunamain mal! Cura che l’artist da 30 onns raquinta dal laschar ir sia uffanza (“The Golden Age”) u dal fatg ch’i dovra magari gist tant curaschi da currer davent sco da far frunt a l’adversari (“Run Boy Run”) na lascha quai indifferent nagin.

Da sperar èsi en mintga cas che Woodkid haja sper sia lavur da reschissur vinavant temp da far musica!

E tgi che vul vesair “live” quest multitalent po far quai a l’Open Air Lumnezia!

Redacziun: Astrid Alexandre